Այն բազան, որտեղ խորհրդային շրջանում միջուկային գլխիկներն էին պահում՝ հիմա վերածվել է անասնագոմի։ Այդ մասին հայտարարել է «Համահայկական ճակատ» շարժման առաջնորդ Արշակ Կարապետյանը։
Հայոց բանակի կազմաքանդումը ՔՊ-ի դիլետանտության խորհրդանիշն է։ ՔՊ-ականներն իշխանության բերվեցին արտաքին ուժերի կողմից փողոցից՝ նրանք չունեին քաղաքական, տնտեսական և ռազմական ոլորտները կառավարելու ոչ փորձ, ոչ գիտելիք, ոչ էլ սովորելու կամ ավելի պրոֆեսիոնալներին լսելու կարողություն և ցանկություն։
ՔՊ-ականների քայլերի արդյունքում Արցախը հանձնվեց Բաքվին՝ Արցախի ՊԲ, որը մարտունակ ռազմական կառույց էր՝կազմաքանդվեց և ոչնչացվեց։ Հայոց բանակն այսօր վերածվել է փորձադաշտի՝դիլետանտները կազմաքանդել են այն, ինչ ստեղծվել էր մի քանի սերունդների կողմից տասնամյակներ շարունակ։
Հարավային Կովկասում հայոց բանակը մինչև դիլետանտների իշխանության բերվելը համարվում էր ամենամարտունակ բանակներից մեկը՝զսպող գործոն էր թուրք-ադրբեջանական տանդեմի համար։
Այսօր բանակը կրճատվում է՝ զենքեր են բերվում տարբեր երկրներից և անհասկանալի է՝արդյոք կան այդ հնդկական և ֆրանսիական զենքերին տիրապետող զինվորականներ, թե ոչ։ ՔՊ-ն փիառվում է զենքեր բերելու թեմայի վրա՝չհասկանալով, թե արդյոք այդ զենքերը կօգնեն ՀՀ-ին Ադրբեջանի դեմ ապագա պատերազմում, թե ոչ։
Բանակը կրճատվում է, սակայն դրան զուգահեռ ավելանում են ոստիկանական ուժերը, որոնք վերածվել են գործող իշխանությունների և ընտանեկան կլանի թիկնազորի։
Բանակից կիրթ և փորձառու սպաները դուրս են գալիս, ինչն ազգային անվտանգության սպառնալիք է և թուլացնում է բանակը ներսից։
ՀՀ զինված ուժերը հնարավոր է փրկել, սակայն դրա համար պետք է փոխել կառավարությունը, քաղաքական ղեկավարությանը, իսկ բանակի ղեկավար կազմում ընդգրկել պրոֆեսիոնալների։
Սեդա Գևորգյան
