Ադրբեջանի պաշտպանության նախարար Զաքիր Հասանովն ապրիլի 16-ին ընդունել է Թուրքիայի Ազգային մեծ ժողովի Ազգային պաշտպանության խորհրդարանական հանձնաժողովի նախագահ, Թուրքիայի ազգային պաշտպանության նախկին նախարար Հուլուսի Աքարի գլխավորած պատվիրակությանը։ Ինչպես հաղորդում է «Արմենպրես»-ը, այս մասին հայտնում է ադրբեջանական ԱՊԱ լրատվական գործակալությունը:
Նշվում է, որ Աքարը գրառում է կատարել Ադրբեջանի ՊՆ-ի «Պատվավոր հյուրերի գրքում»։
Հասանովը նշել է, որ ուրախ է Ադրբեջանում Թուրքիայից ժամանած հյուրերին տեսնելու համար։ Նախարարն ընդգծել է, որ երկու երկրների ղեկավարների անկեղծ հարաբերությունները հատուկ դեր են խաղում բոլոր ոլորտներում, այդ թվում՝ Ադրբեջանի և Թուրքիայի միջև ռազմական համագործակցության զարգացման գործում։
Աքարն իր հերթին գոհունակություն է հայտնել այս տարի Ադրբեջան կատարած իր առաջին այցի կապակցությամբ և շնորհակալություն հայտնել ջերմ ընդունելության և հյուրընկալության համար։ Կարևորելով փոխայցելությունները՝ նա մասնավորապես ընդգծել է, որ Ադրբեջանի և Թուրքիայի միջև ռազմական կապերը, որոնք հասել են ռազմավարական դաշինքի մակարդակի, շարունակաբար զարգանում են:
Հանդիպումը ներառել է մտքերի լայն փոխանակում փոխադարձ հետաքրքրություն ներկայացնող հարցերի, այդ թվում՝ տարածաշրջանային անվտանգության շուրջ։
