ԱԺ հանձնաժողովների համատեղ նիստում այսօր՝ հոկտեմբերի 28-ին, 2025 թվականի բյուջեի նախագծի քննարկումը ՀՀ վարչապետ Նիկոլ Փաշինյանն սկսեց նախկինում իր արած մի քանի դիտարկումներով:
«Դրանցից առաջինը «Հայաստանն իմ օջախն է, ժողովուրդն իմ ընտանիքն է» բանաձեւն է, երկրորդը՝ «հարստացիր եւ հարստացրու», երրորդը՝ «Հայաստանի ապագան կախված է մեկ մարդուց եւ այդ մեկ մարդը դու ես», 4-րդ բանաձեւը հետեւյալն է. «Հայերնիքը պետությունն է, սիրում ես հայրենիքդ՝ ուժեղացրու պետությունդ», 5-րդ բանաձեւը. «Այստեղ պետություն՝ այստեղ հաց, այստեղ հայրենիք՝ այստեղ կաց:
Այս բոլոր բանաձևերն ուզում եմ դնել իրական Հայաստանի հայեցակարգային շրջանակի մեջ ու այդ դիտանկյունց մեկնարկել բյուջետային քննարկումներն այն ընկալմամբ, որ ասելիքը վերաբերում է ոչ միայն 2025 թվականի պետական բյուջեին, այլև Հայաստանի Հանարպետության պետական բյուջե հասկացությանն ընդհանրապես»,- ասաց նա:
Հետո վարչապետը մանրամասն ներկայացնում էր, թե ինչ է պետական բյուջեն, ինչ է հարկը, ինչպես է ձեւավորվում բյուջեն, ովքեր են այն ձեւավորում եւ այլն:
«Եվ ուրեմն ի՞նչ է ՀՀ պետական բյուջեն: ՀՀ պետական բյուջեն մեր բոլորիս, ՀՀ յուրաքանչյուր քաղաքացու մեծ ընտանեկան բյուջեն է: Երկրում կան տարբեր բյուջեներ՝ համայնքային, որ ձևավորում են համայնքներն ավագանիների հետ, մասնավոր կազմակերպությունների բյուջեներ, կան նաև ընտանեկան բյուջեներ: Չեմ կարծում, թե Հայաստանում շատ են այն ընտանիքները, որ հաշվարկում, նախապես պլանավորում են իրենց տարեկան եկամուտները, բայց եթե մեր ընտանիքներում բյուջետային հաշվարկների փաթեթեներ չկան, չի նշանակում, թե ընտանեկան բյուջեներ չկան:
Հայաստանն իմ տունն է, ժողովուրդն իմ ընտանիքն է հայեցակարգային տրամաբանությամբ ՀՀ բյուջեն մեր հավաքական ընտանիքի բյուջեն է, որովհետև այն ձևավորվում է մեր բոլորիս, ՀՀ-ում ապրող և գործունեություն ծավալող քաղաքացիների ու բնակիչների աշխատանքի ու գործունեության արդյունքում»,- ասաց Փաշինյանը:
Նա նաեւ հայտարարեց. «Միայն պետությունը կարող է ունենալ պետական բյուջե»
