ԵՄ երկրների ԱԳՆ ղեկավարները դեկտեմբերի 17-ին կքննարկեն Վրաստանի իրադարձություններին միջամտելու ուղիները, ներառյալ պատժամիջոցներ մտցնելը եւ անվիզա ռեժիմի սահմանափակումների հնարավորությունը։ Այս մասին տեղեկացրել է Էստոնիայի ԱԳՆ ղեկավար Մարգուս Ցախկնան։
«Մենք կդիտարկենք վրացական թեման ԵՄ արտաքին գործերի հաջորդ Խորհրդում դեկտեմբերի 17-ին։ Եվրահանձնաժողովը կներկայացնի առաջարկների փաթեթ։ Կան շատ քայլեր, որոնք կարող ենք ձեռնարկել, ներառյալ մուտքի արգելքը վրացի բարձրաստիճան պաշտոնյաների համար, վիզային ռեժիմի [սահմանափակման] հարցերը եւ այլն»,- ասել է նա։
Ցախկնան գնահատել է Վրաստանում հոկտեմբերին կայացած խորհրդարանական ընտրությունները որպես «անօրինական եւ անարդար», ինչից հետո փորձել է պատասխանատվությունը դնել «Ռուսաստանի միջամտության» վրա։
Լիտվայի ԱԳՆ ղեկավար Գաբրիելյուս Լանդսբերգիսը տեղեկացրել է, որ եվրադիվանագիտության նոր ղեկավար Կայա Կալասն արդեն պատրաստում է առաջարկներ Եվրահանձնաժողովին ներկայացնելու համար Թբիլիսիի «ճնշման» վերաբերյալ, որպեսզի Վրաստանին ստիպեն վերադառնալ Եվրամիությանն ինտեգրվելու ճանապարհ։
