Եղբայրական Ադրբեջանի հետ հարաբերությունները շատ կարևոր նշանակություն ունեն Ղազախստանի համար. այս մասին ասել է երկրի նախագահ Կասիմ Ժոմարտ Տոկաևն Ադրբեջանի ԱԳ նախարար Ջեյհուն Բայրամովի հետ հանդիպմանը:
Հանդիպման ընթացքում քննարկվել են խոշոր ռազմավարական ծրագրերի իրականացման, այդ թվում՝ Կասպից ծովի հատակով օպտիկամանրաթելային կապի գծի և խորջրյա էլեկտրական մալուխի անցկացման հարցեր։ Քննարկվել են նաև առևտրի, ներդրումների, թվայնացման, տարանցման և տրանսպորտի ոլորտներում հետագա համագործակցության հեռանկարները։
Ադրբեջանն ու Ղազախստանը կյանքի են կոչում Տրանսկասպյան տրանսպորտային միջանցքը կամ Միջին միջանցքը, ինչը թույլ կտա ղազախական ապրանքներն, նավթն ու գազը արտահանել ադրբեջանական լոգիստիկայով դեպի Եվրոպա և Թուրքիա։
Նշենք, որ Ադրբեջանն ու Ղազախստանը Թյուրքական պետությունների կազմակերպության անդամ են։ Ադրբեջանն իր տարանցման հնարավորություններն է տրամադրում Կասպից ծովի թյուրքախոս երկրներին՝ Ղազախստանին և Թուրքմենստանին։
Բացի տնտեսական, տրանսպորտային-էներգետիկ կապերը, կողմերը զարգացնում են նաև ռազմա-տեխնիկական համագործակցությունը։
Ադրբեջանի և Ղազախստանի զինված ուժերը համատեղ զորավարժություններ են անցկացրել ղազախական Ժարկենթ քաղաքում։
Հուլիսին Ադրբեջանի զինուժը Ղազախստանում մասնակցել է նաև Կենտրոնական Ասիայի երկրների մասնակցությամբ զորավարժություններին։ “Biplestik-2024” վարժանքներին ներգրավված էին Ղազախստանի, Ադրբեջանի, Ղրղըզստանի, Տաջիկստանի և Ուզբեկստանի զինված ուժերից շուրջ չորս հազար զինվորական, մինչև 700 միավոր զինտեխնիկա։
Թուրքիայի և Արևմուտքի շահերից է բխում Ադրբեջան-Ղազախստան կապերի խորացումը, քանի որ այդ երկրներով են անցնում ՌԴ-ն և Իրանը շրջանցող նավթագազամուղերը, տրանսպորտային լոգիստիկան։ Եվրոպան ստանում է ելք դեպի կասպյան էներգակիրներ՝նվազեցնելով կախվածությունը ռուսական գազից, իսկ Թուրքիայի համար դա Մեծ Թուրանի լոգիստիկան է։
Սեդա Գևորգյան
