Այս իշխանության ներկայացուցիչներն ասում են՝ «Հայաստանում քաղբանտարկյալներ չկան, նայած, թե դուք ինչ եք հասկանում «քաղբանտարկյալ» բառի տակ»:
Իսկ ես ձեզ հարցնում եմ, եթե մարդն իր քաղաքական հայտարարության համար կալանավորվում է, ապա նա քրեական հանցագո՞րծ է, թե ոչ: Խոսում ենք դատարանից, անկախ դատավորներից, դատախազությունից ու չենք բարձրաձայնում, որ այսօր այս համակարգերը զավթված են: 1994 թվականից զավթվել է Հայաստանի Հանրապետությունը, և մինչ օրս զավթված է: Վարչապետն ասում է՝ «Մենք ազատ, անկախ, դեմոկրատական պետություն ենք», հետո ասում է՝ «Կառավարությունը ես եմ, թող գտնվի մեկը, ով իմ որոշումների հետ չի համաձայնվի»: Վերջերս էլ ասաց, որ ով բողոքի ձայն բարձրացնի կամ բռնության կոչեր անի՝ կկալանավորվի:
Անձամբ ես բողոքի ձայն եմ բարձրացնում, անձամբ ես դիմում եմ իրեն, ասելով, որ Դուք՝ վարչապետի աթոռը զբաղեցրած անձ, իրավունք չունեք լինելու Հայաստանի Հանրապետության վարչապետ: Նաև դիմում եմ բոլոր քաղաքական ուժերին. եկեք միավորվենք և գեներացնենք հանրային պահանջ՝ Ն.Փաշինյանից հրաժարական պահանջելու նպատակով, որպեսզի գոնե 2026-ին մենք իմանանք, թե ուր և ինչի համար ենք գնում:
Այս մարդը պարզապես մեր՝ ՀՀ քաղաքացիներիս հաշվին, տաք սենյակ և շքախումբ է գտել՝ որպես իրեն մշտապես ուղեկցող ջոկատ, այս տղաներին առավոտից երեկո տանջելով իր վարչապետական պաշտոնն է պահում ու վայելում: Մե՛նք ենք նրան գումար տալիս, որ նա ծառայի Հայաստանի Հանրապետությանը, հայ ժողովրդին: Մենք գումար չե՛նք տալիս, որ իր ձեռքում գերի դառնանք: Սա է պահանջը: Ի վերջո, մենք պետք է գիտակցենք, որ այս կառավարության շենքը, գլխավոր դատախազության շենքը, ոստիկանական համակարգը, բանակը պահում է Հայաստանի Հանրապետության քաղաքացին, ոչ թե իրենք են մեզ պահում, այլ մենք ենք պահում այս ամբողջ համակարգը, որ անվտանգ ապրենք և արարենք մեր երկրում:
«Համահայկական ճակատ» կուսակցության ղեկավար, Զինված ուժերի պահեստազորի փոխգնդապետ Արսեն Վարդանյանի հարցազրույցից հատված
