Հաշվի առնելով, որ

— վերջին օրերին մեծ աղմուկ հանած քաղաքացիական պահանջը գտնվում է ՀՀ քաղաքացիների օրինական իրավունքների շրջանակում,

— քաղաքական իշխանությունները չբավարարեցին ՀՀ քաղաքացիների տեղեկացված լինելու իրավունքը,

— ավելին, թույլ տվեցին անվայել պահվածք պետական բարձր պատասխանատվության պաշտոնյայի դեյուրե գործատու ՀՀ քաղաքացիների նկատմամբ,

«Համահայկական ճակատ»-ը հայտարարում է.

— անտրամաբանական և հակաիրավական է, որ պետական մակարդակով պատվիրված «քննիչ հանձնաժողովը» ձևավորվել է այն քաղաքական ուժի կողմից ու անդամների ներառմամբ, որի ԱԺ մեծամասնություն լինելու ժամանակ և որի կողմից նշանակած ԳԳՀ֊ի ղեկավարությամբ տեղի է ունեցել պարտված պատերազմը,

— անտրամաբանական և հակաիրավական է, որ այդ քննիչ հանձնաժողովը հայտարարել է իր առջև դրված խնդիրն ավարտելու մասին, սակայն դա ոչ միայն չի հրապարակվում, ԱԺ֊ում հաշվետվություն չի ներկայացվում, այլ չկան անգամ ընդհանուր եզրակացություններ այն մասին, թե ում կամ ինչ թիմերի վրա է ծանրանում պատասխանատվության բեռը։

«Համահայկական ճակատ»-ը ընդունել է քաղաքական որոշում` հետևողականորեն ուսումնասիրել «քննիչ հանձնաժողովի» կազմի կոմպետենտությունը պետական առաջնային կարևորության հանձնաժողովում ընդգրկվելու համար,

— օրենքով թույլատրելի բոլոր միջոցներով հասնել հանձնաժողովի աշխատանքի արդյունքների առնվազն այն մասի հրապարակմանը, որը պետական շահի և անվտանգության նկատառումները հաշվի առնելով հրապարակման ենթակա կարող է լինել,

— օրենքով թույլատրելի բոլոր միջոցներով հասնել նոր քննիչ հանձնաժողովի ձևավորման, որի կազմում ընդգրկված չեն լինի ուղղակիորեն կամ անուղղակի կերպով շահագրգիռ կողմ հանդիսացող անձիք,

— իր ողջ ներուժն օգտագործել պարտության իրական պատճառները բացահայտելու, պատասխատվություն կրելու ենթակա անձանց/թիմերին/ արժանի պատասխանատվության ենթարկելու համար։

«Համահայկական ճակատ»-ը հայտարարում է, որ իր գործունեությունը չի ծավալում ներքին քաղաքական դաշտում դիվիդենտներ հավաքելու համար, իշխանական լծակներ կամ ԱԺ մանդատներ ստանալը չի հանդիսանում նպատակ, այլ իր ողջ ներուժը օգտագործում և օգտագործելու է միայն ազգային և պետական շահի համար։