Ռուսաստանից դուրս գալու ուղղությամբ «Վերին Լարս» անցակետի չեզոք գոտում տրանսպորտային միջոցների զգալի կուտակում է նկատվում, հայտնում է Ռուսաստանի Դաշնային մաքսային ծառայությունը։ Բեռնատարների անցումը դանդաղել է հարևան կողմի ընդունման դանդաղ գործընթացի պատճառով, ինչի հետևանքով մեքենաները չեն կարողանում անցնել չեզոք գոտի։

Անցակետի հարակից այլ հատվածներում սպասում է ավելի քան 450 բեռնատար։ Միաժամանակ «Վերին Լարսի» մոտ մարդատար մեքենաների հերթ չկա։

ՌԴ մաքսային ծառայությունները աշխատում են բնականոն ռեժիմով և պատրաստ են բարձր ծանրաբեռնվածությանը։ Վերջին մեկ օրում դուրս գալու համար ձևակերպվել է ավելի քան 1,7 հազար մարդատար ավտոմեքենա, սահմանը հատել է ավելի քան 8 հազար մարդ, մուտքի ուղղությամբ՝ 1,3 հազար մեքենա և ավելի քան 5 հազար անձ, իսկ ծառայությունը հորդորում է երթուղիները պլանավորելիս հաշվի առնել իրավիճակը։