Վարչապետ Նիկոլ Փաշինյանը ներկա է գտնվել «ՀՀ վարչապետի գավաթ» լողի սիրողական մրցաշարի պարգևատրման արարողությանը:
Ադրբեջանական ԶԼՄ-ները մի քանի օր շարունակ ՀՀ-ին անհիմն մեղադրում են ադրբեջանական դիրքերի ուղղությամբ կրակելու մեջ։ ՀՀ ՊՆ-ն հերքում է ադրբեջանական ապատեղեկատվությունը, սակայն բոլորի համար էլ պարզ է, որ Բաքուն փորձում է սադրել նոր պատերազմ՝խաղաղության պայմանագիր չստորագրելու և «Զանգեզուրի միջանցքի» բացման՝պատրվակ ստեղծելու համար։
Այս ֆոնին բանակը վերազինելու՝հասարակությանը նոր հնարավոր պատերազմին նախապատրաստելու փոխարեն Փաշինյանը սիրողական լողի պարգևատրմանն է մասնակցում։ Սա խոսում է երկրում տիրող դիլետանտական կառավարման կամ անկառավարելի իրավիճակի մասին, երբ հասարակության ուշադրությունը շեղում են մանր խնդիրների վրա՝ստեղծում են արհեստական օրակարգեր, իսկ պատերազմի իրական վտանգի մասին չեն խոսում և չեն պատրաստվում։
ՔՊ-ականները վայելում են ծովափնյա, ամառային հանգիստը՝Փաշինյանը հեծանիվի PR-ով է զբաղված, իսկ տարածաշրջանը արագ տեմպերով զինվում է և պատրաստվում մեծ պատերազմի։
Բաքուն և Անկարան չեն հրաժարվել «Զանգեզուրի միջանցքից» և ինչքան էլ հեծանիվի սիրահար Փաշինյանը չխոսի միջանցքի մասին՝դա չի նշանակում, որ ՀՀ-ի հակառակորդներն այդ միջանցքի գաղափարից հրաժարվել են կամ մոռացել են։
ՀՀ-ի վրա Ադրբեջանը չի հարձակվում մի քանի պատճառով՝նախ զսպող գործոններ են ՀՀ-ում ռուսական ռազմական ներկայությունը, ԵՄ-ի դիտորդական խմբերը՝Արևմուտքի, այդ թվում ԱՄՆ-ի և Ֆրանսիայի կոշտ նախազգուշացումներն Ադրբեջանին, ինչպես նաև Իրանի միանշանակ դիրքորոշումը ՀՀ տարածքային ամբողջականության և Սյունիքի նկատմամբ։
Սակայն գեոպոլիտիկ իրավիճակը կարող է փոխվել ժամերի ընթացքում՝Իրանի դեմ կարող է սկսվել մեծ պատերազմ՝Իսրայելի և Արևմուտքի՝ՆԱՏՕ-ի մասնակցությամբ, ՌԴ-ն խնդիրներ ունի ուկրաինական ճակատում, իսկ ԱՄՆ-ում՝նախընտրական քարոզարշավ է։ Ադրբեջանական բանակը կարող է փորձել «բլից-կրիգ» իրականացնել Սյունիքում՝բացելով միջանցքը զենքի ուժով, ինչից հետո գերտերությունները կփորձեն ստիպել Բաքվին դուրս բերել զորքերը, իսկ Ադրբեջանը դրան կհամաձայնվի միայն «Զանգեզուրի միջանցքը» տրամադրելու պայմանով՝դա ներկայացնելով, որպես փոխզիջում։
Սեդա Գևորգյան
