Պետք է ստեղծել Հարավային ռազմական դաշինք՝ՌԴ-ՀՀ-Իրան ֆորմատով, որը կկայունացներ իրավիճակը տարածաշրջանում։ Այդ մասին հայտարարել է «Համահայկական ճակատ» շարժման առաջնորդ Արշակ Կարապետյանը։
Հայաստանն ունի անվտանգային երկու հենասյուն՝ՌԴ-ն և Իրանը, որոնց օգնությամբ ՀՀ-ն տասնամյակներ շարունակ կարողանում էր դիմագրավել թուրք-ադրբեջանական տանդեմին և ունենալ Հարավային Կովկասի ամենամարտունակ բանակը։
ՌԴ-ի ռազմական ներկայությունը հայ-թուրքական սահմանին թույլ էր տալիս ՀՀ-ն ունենալ ապահով թիկունք և բոլոր ռազմական ռեսուրսները կենտրոնացնել Արցախում և հայ-ադրբեջանական սահմանի ողջ երկայնքով։ Այսօր էլ ռուսական ռազմաբազան ՀՀ-ում զսպող գործոն է Անկարայի և Բաքվի համար՝չնայած Փաշինյանի և ՔՊ-ի ջանքերին զրոյացնել հայ-ռուսական ռազմական կապերը։
Իրանը՝ՀՀ-ի այլընտրանքային պատուհանն է դեպի մեծ աշխարհ, իրանական շուկան հետաքրքիր է հայկական բիզնեսի համար, այսօր ՀՀ-ն ԵԱՏՄ-ի անդամ է և Իրանն ԵԱՏՄ-ի հետ ազատ առևտրի պայմանագիր է կնքել։ Իրանը հետաքրքված է ՀՀ-ի կայունությամբ և հզորությամբ, չի ցանկանում, որպեսզի կյանքի կոչվի Փաշինյան-Ալիև տանդեմի ծրագիրը՝Զանգեզուրի միջանցքը և փորձում է ՀՀ-ի տարածքով դուրս գալ դեպի ՌԴ և Սև ծով։
Իրանն ու ՌԴ-ն՝հայ ժողովրդի երկարաժամկետ դաշնակիցներն են։ Փաշինյանը ցանկանում է զրոյացնել ռուսական ռազմա-քաղաքական ներկայությունը ՀՀ-ում և այն փոխարինել Արևմուտքի և Թուրքիայի ներկայությամբ։
Ադրբեջանն ակտիվորեն զինվում է, պատրաստվում է լայնածավալ պատերազմի՝դրան զուգահեռ ՔՊ-ականներն ապրում են այլ իրականության մեջ՝վայելում են կյանքը, մասնակցում են փառատոններին, պայքարում են ազգային ուժերի դեմ, իսկ նրանց առաջնորդ Փաշինյանը հեծանիվ է վարում։
Այսպիսով, ՀՀ-ի փրկությունը՝ռուս-իրանական դաշինքին օր առաջ միանալու մեջ է՝Մեծ Թուրանի ծրագիրը թույլ չտալու համար։
Սեդա Գևորգյան
